Karamaian Kopitongkiadan - Keiso

Mogiruruhai koulianku hilo Sabah om migog tigog hiti ginawo. Oropod@ondos nogi nga awagat hiti ginawoku kumuli pomogunan Sabah. Nga agayo-gayo noh bo kayo ginawoku gumuli tu' kosorou oku dit 'Mee guring Basah Suminimpod' di Mummy. HEHE.. Kawagat nopo ginawoku gumuli nga tumongkiad dot SINTA@JIWA dit poingkaraja hiti soborong mogihum dot takan akanon om nogi mogihum siin kumawin (Kanto ). HAHA..Soira oboros koptingkiadan om osorou tokou noh karamain kopitongkiadan (Farewell ka dii Urang Putih) kio. Nawii-awi noh ot tadau-tadau ku dot nosuangan ngawi karamain mangakan-akan miampai tambalut ngawi. Karamaian kopitongkiadan ku nopo di ke-iso nga  tambalut ku d gulu hilo id UMS. 

Hilo da id Sunway Pyramid koi miruba nga nawi tikit wayang dot The Jungle Book hilo om hilo koi di id 1 Utama Damansara . Onom koi tulun ruminuba iri noh tu' e Buddy, Waja, Caden (Chu), Kah Ming om e Sia. 

Engineer noh d ngawi 

Mumbal nopo dot tomyam opodos om mumbal hiti id Absolute Thai 

Obuli tomod tomyam Thailand kangaam dot korohian tulun tokou tu' ongopodos om ki suup nogi. Isai-isai siakan tomyam om kada korosi mumbal hiti. 

MONGITOB TADAU

Asaru mintong blog tulun nga koinsanai okon nopo id Boros Soborong (Melayu) nga Boros Urang Putih (English). Nokosoliwan pomusarahan do monulis id boros sondiri iri noh tu dusun Ranau. Umbal-umbalan e monulis id boros tokou mulong po awu kopio milo. Oilaan tokou tu' mimboros nopo nga milo ngawi nga monulis nopo om mimborilit noh moti kasari ot tutok momusorou poingkuro mongija. HAHA okon ko kasari-sari gia gunaon boros dusun dot monulis. Yoku sondiri nga ogumu po kopio awu oilaan istilah id Dusun tu nokosampur noh gia boros soborong nga poingkuro po poingkuro nga umbalan  e kasari nunu nopo it toilaan om posoliwanon nopo. Hiti noh di kaka diti mumbal-umbal monulis id boros tokou. 

Baino nopo nga tadau ke-turu po kumaraja oku hiti id Formosa Prosonic Industries Berhad (http://www.fp-group.com/prosonic/profile.html) id Pelabuhan Utara Klang, Selangor tu muli oku noh Sabah gisom-gisom (HAHA Iti nopo ti nga pomusarahan ku noh awu oilaan id tadau kawagu dung koguli po hiti). Pogulion tokou nopo gia ngawi ri kumaa di Minamangun tu' tokou nopo nga milo noh 'Merancang' om e Minamangun noh ot 'Menentukan" ka di kio. Agayo ginawo ku kumaraja id pomogunan  sondiri tu' okon nogi milo muli kampung soira nopo korohiyan nga osonong nogi nunu nopo urusan hilo id kampung. Osonong mato mintong nulu Kinabalu, mintong waig bawang dit opurak, mangakan mangga dit osukup koonsomon gisom monguntik mato, mangakan lado opurak, mangakan takano om lado soroi + balasan, mangakan mee guring haro suup, mangakan sinalau bakas (Non-Halal), mangakan Bosou, mangakan wagas wagu, om lumangad nogi mintong tanak wagu haha. Ogumu po moti daa ot boroson dit kalangadan id pogun sondiri soira hilo tokou id sodu id pogun suai mogihum pangakan akan nga awu di ngawi otulisku baino. Soruwa e kawagu boroson tokou ngawi iso om iso. Nga pointopot nopo kopio nga koulian ku nopo ti nga suminakit tapa dagai dit 05/01/2016 (Strok) om minangan bodaho ot tulu minonggidu dit raha nokokodou hilo id tutok. 7jam moti tapa id suwang dot 'Operation room'. Hiti noh ngawi sabab ku dot kumaraja id somok-somok tu milo mogoi intong-intong diolo hilo kampung.  Ponsikou kopio kosianan Tuhan kumaa di tapa tu' olomus e tapa kapanau mulong po okon ko miagal pamanau d laid. 

Bah om kumponi nopo karajaon ku baino ti nga kumponi Taiwan iri noh tu' momonsoi luspiko (Specialized in Audio Technology). Om kogumuan nopo pongkaraja hiti nga singkung ngawi, Taiwanese company ka pogi gia. Orohiyan oku e da poingkaraja hiti tu milo oku e balajar Mandarin okudi-kudi nga nunu po kuroyon osodu kopio muli. Haro maso mesuarat  nga mimboros nopo ngawi  Mandarin tu iso oku noh gia tulun suai om osorou diolo yoku nga singkung e (Mata Sepet) kaka gia. Okon nopo Mandarin nga Japanese tu' haro purujik diolo miampai Roland Malaysia om Roland Japan.  Om soira nopo mesuarat, bos mantad Taiwan rumikot om awu noh koilo dit okon ko koilo oku gia Mandarin. Hiti noh ngawi pangalaman ku dit awu olingan maso-maso karaja hiti. KRIK KRIK oku mantad timpunan om gisom awi ot mesuarat. Andadon nopo nunu koputusan diolo tu tulison gia ngawi koputusan id papan opurak. Mogot po gia tu' English ngawi ot slide. Kopoilaan tokou ngawi, kogumuan nopo tulun Sabah dit kumaraja hiti semenanjung nga andasan diolo dot singkung e ngawi.


Kumponi ku nopo hilo Sabah nga Sedafiat Sdn Bhd. om kumaraja oku hilo id Hospital Queen Elizabeth 1 momonsoi misin perubatan kaka bo. Awu po oilaan poingkuro noh karaja hilo. Mongitob po tadau koulian Sabah diti tompinai. Arap po Tuhan manganu ginawo osimbayan diti timpu magandad maso muli om barakatan ralan ku muli. 


Tohuri nopo boroson ku nga mikiampun noh dikoyu it awu karati diti borosku kio.  Maso arajin rajin do monulis mangan ku dwi-bahasa ko tri-bahasa kio ambalut ngawi. 

Dusun Poingompus! Dusun id Ginawo! ARAMAI TIII Saana RANAU



Sabah Blogger United